Recent in Technology

হনুমন্তৰ লঙ্কাদর্শন/ Lesson-13 Textbook/ Class 9 Assamese/ SEBA

Attention Please!

হনুমন্তৰ লঙ্কাদর্শন class 9 assamese lesson 13 Online extbook for readers Assam seba board নৱম শ্ৰেণীৰ অসমীয়া সাহিত্য চয়নিকা


হনুমন্তৰ লঙ্কাদর্শন/ Lesson-13 Textbook/ Class 9 Assamese/ SEBA


হনুমন্তৰ লঙ্কাদর্শন/Lesson13




মাধৱ কন্দলী


লঙ্কাপুৰী দেখিলন্ত ত্রিকূট উপৰে। 
দুতী অস্ৰাৱতী যেন সমুদ্র ভিতৰে।। 
সুবেল গিৰিৰ শৃঙ্গ আতি বিতােপন। 
তহিতে পৰিলা গৈয়া পৱন নন্দন।। 
সুবেলত বসিয়া গুনন্ত মহাবীৰ। 
প্রয়াস নভৈল মােৰ সুস্থসে শৰীৰ।। 
সাগৰ তৰিয়া আইলাে ইটো কোন গহ। 
কোটি যােজনক যাইবাে তাকো আছে সাহ।। 
শতেক যােজন আইলাে ইটো কোন কাজ 
ইসব কাহিনী কহিবাকো লাগে লাজ।। 
তৰিলন্ত সাগৰ নভৈল কিছু শঙ্কা। 
সুবেলত বসিয়া বীৰে দেখিলন্ত লঙ্কা।। 
মাথা তুলি দেখ আদিত্য অস্ত যান্ত। 
কৰ যােৰে হমন্তে দিলন্ত সিদ্ধান্ত।।
জানু শিৰ কৰি জুৰিলন্ত যােৰহাত। 
ত্রৈলােক্যৰ দীপ বুলি নমিলন্ত মাথ।। 
খানিতেক তম্ভিয়ােক ৰাম কাৰ্য্য সাওঁ। 
দিবাভাগে লঙ্কাৰ গড়ক ফুৰি চাওঁ।।
হেন শুনি তুষ্ট ভৈলা কাশ্যপ নন্দন। 
দেখি হনুমন্তৰ হৰিষ ভৈল মন। 
সুবেলৰ হন্তে বীৰ দৃষ্টি বলাই চান্ত। 
দিবা ভাগে লঙ্কাৰ গড়ক দেখিলন্ত।। 
সুবেলৰ নামি নগৰীক লাগি যান্ত। 
অনেক বনক হনুমন্তে দেখিলন্ত।। 
গুঞ্জৰিত শবদে ভ্ৰমৰা মধুপান। 
পদ্মিনী দিঘী জলাশয় ৰম্য থান।। 
সৰল পিয়াল খৰ নিখৰ খৰ্জ্জুৰ।। 
শাল তাল তমাল গমাৰি বীজপুৰ।। 
অশ্বথ কপিত্থ বট নাৰঙ্গ বদৰ। 
তেন্তেলি কন্টকি আম জাম নাগেশ্বৰ।। 
খাজুৰি হাৰিঠা আমলখি ডহাফল। 
ছাতিয়াল গুৱা নাৰিকেল যে শ্রীফল।। 
সলঙ্গা মহৰি আৰু কমলা টেঙ্গ। 
কর্দৈ পিচুমদ্দক যে সােলঙ্গা আমৰা।। 
কদম্ব গুলাল পাৰিজাতক আশেষ। 
সেৱতী মালতী গুটিমালী যে বিশেষ।। 
বাৰয় বসন্তে অনুকূলে বহে বাৱ।
ষড়ঋতু নছাড়য় কোকিলৰ ৰাৱ।। 
অনেক আছয় পশু চটক আশেষ। 
সুবৰ্ণ মাণিক মণি ৰতন বিশেষ।। 
সাগৰে উথাৰি থৈল মুকুতাৰ দাম। 
চিত্র বিচিত্র তাক দেখি অনুপাম।। 
লঙ্কাৰ সমীপ বনে দিন গােট নিল। 
গধূলিকা বেলা বীৰে পৰামৰিশিল।। 
ইসব শৰীৰে যেবে পেষওঁ নগৰ। 
ৰাক্ষসে বান্ধিয়া ফুৰাইবে ঘৰে ঘৰ।। 
বিৰাল সমান সঙ্কুচিত কলেৱৰে। 
হনুমন্তে চড়িলন্ত প্রাঞ্চিৰ উপৰে।।
গােধূলিকা বেলা শ্রী দেখিলা লঙ্কাৰ। 
দূতী অম্ৰাৱতী যেন জগততে সাৰ।। 
অনেক প্রবন্ধে বিশ্বকৰ্ম্মেসে নির্মিল। 
লঙ্কা বেঢ়ি সুৱৰ্ণৰ গড় প্রাঞ্চি দিল।। 
অনেক যােজন পথ গগনে উধাৱ। 
সুবৰ্ণ মাণিক মণি জ্বলে ঠাৱে ঠাৱ।। 
ঠাইখান দেখিলন্ত বহল বিস্তাৰ। 
গড়গােটে বেঢ়ি আছে সকলে লঙ্কাৰ।। 
নানা যন্ত্র সাজি তাত আছে শাৰী শাৰী। 
দেৱাসুৰ সবে তাক লঙ্ঘিতে নপাৰি।। 
বিষম সঙ্কট আতি দুর্গমৰ থান। 
দেখি চিন্তাবিষ্ট ভৈলা বীৰ হনুমান।। 
অঙ্গদ সুগ্রীৱ নীল আমি সমে চাৰি। 
এতেকেসে সাগৰক তৰিবাক পাৰি।। 
শতেক যােজন পথ সাগৰক তৰি। 
ইঠাৱক বানৰ আসিবে কেনে কৰি।। 
বানৰ বৰ্গৰ ইঠাৱত কোন কাম। 
কিবা কৰিবন্ত আসি দাশৰথী ৰাম।। 
ৰাম লক্ষ্মণ যাতে অচিন্ত্য প্ৰভাৱ। 
সি কাৰণে মনত কিঞ্চিত দিও ঠাৱ।। ৪০৯৫





কবি-পৰিচয় :

অসমীয়া সাহিত্যৰ শংকৰ-পূর্ব যুগৰ কবিসকলৰ ভিতৰত শ্রেষ্ঠ কবিগৰাকী আছিল কবিৰাজ মাধৱ কন্দলী (চতুর্দশ শতিকা)।

মাধৱ কন্দলীৰ পৃষ্ঠপােষক ৰজাজনৰ নাম আছিল বাৰাহ (বৰাহী) ৰজা মহামাণিক্য। পুৰণি অসমৰ পূব-মধ্যাঞ্চলৰ কোনাে অঞ্চলত এই ৰজাজনে ৰাজত্ব কৰিছিল বুলি ধাৰণা কৰা হয়। এইজন ৰজাৰ পৃষ্ঠপােষকতা লাভ কৰিয়ে মাধৱ কন্দলীয়ে বাল্মীকি ৰচিত সংস্কৃত ৰামায়ণ মহাকাব্যখন অসমীয়ালৈ অনুবাদ কৰিছিল। 

মাধৱ কন্দলীয়ে সম্পূর্ণ ৰামায়ণখন অনুবাদ কৰিছিল; কিন্তু বর্তমান মাধৱ কন্দলীৰ ৰামায়ণৰ আদিকাণ্ড আৰু উত্তৰাকাণ্ডৰ বাহিৰে মাজৰ পাঁচোটা কাণ্ডহে পােৱা যায়। পৰৱৰ্তী সময়ত আদিকাণ্ড মহাপুৰুষ মাধৱদেৱে আৰু উত্তৰাকাণ্ড মহাপুৰুষ শংকৰদেৱে ৰচনা কৰি মাধৱ কন্দলীৰ ৰামায়ণখন সম্পূর্ণ কৰিছিল।

উত্তৰ ভাৰতৰ আঞ্চলিক ভাষাসমূহৰ ভিতৰত প্ৰথমতে অসমীয়া ভাষাতেই মাধৱ কন্দলীয়ে সংস্কৃত ৰামায়ণখন অনুবাদ কৰে। শংকৰদেৱে মাধব কন্দলীৰ কাব্য-প্রতিভাক সন্মান জনাই অপ্রমাদী কবি বুলি অভিহিত কৰিছিল।

পাঠবােধ : মাধৱ কন্দলীৰ ভাষা আৰু সাহিত্যৰ ধাৰণা লাভ কৰিবৰ বাবে তেওঁৰ সুন্দৰাকাণ্ড ৰামায়ণৰ পৰা হনুমন্তৰ লঙ্কাদর্শন’ শিৰােনামাৰে এই কাব্যাংশ নির্বাচিত কৰা হৈছে। 

উল্লিখিত কাব্যাংশত সীতাৰ অন্বেষণত যােৱা হনুমানে বিশাল সাগৰ পাৰ হৈ সুবেল বা ত্রিকূটগিৰি শৃংগত অৱতৰণ কৰা আৰু ত্রিকূট পর্বতৰ ওপৰত দেখা ৰজা ৰাৱণৰ লংকা নগৰীৰ কিছু বিৱৰণ সন্নিবিষ্ট হৈছে।

ৰামায়ণৰ সুন্দৰাকাণ্ডৰ ঘাইকৈ দ্বিতীয় সৰ্গৰ আধাৰত অনুবাদ কৰা এই অংশত মাধৱ কন্দলীয়ে মূলৰ বিষয়বস্তু চমু ৰূপত উপস্থাপন কৰিছে। অৱশ্যে তাৰ মাজতেই কবিৰ নিজস্ব কথা দুই-এটাও সংযােজিত হৈছে। 

শব্দার্থ আৰু টোকা : 

অচিন্ত্য প্ৰভাৱ : চিন্তা কৰিব নােৱৰা প্ৰভাৱযুক্ত। 
অম্ৰাৱতী - বিশ্বকর্মা নির্মিত দেৱপুৰী, ইন্দ্ৰৰ ৰাজধানী। 
অশ্বথ - পবিত্র বৰগছ, আঁহত গছ। 
কণ্টকি - কাইটীয়া গছ। 
কপিন্থ - টেঙা। 
কমলা টেঙ্গ - কমলা টেঙা। 
কলেৱৰ -শৰীৰ। 
গড় - দুর্গ; ইটা, মাটি বা কাঠৰ শকত আৰু ওখ প্রাচীৰ। 
গগনে - আকাশলৈ।
গহ - গর্ব, মই বৰ ভাৱ।
গুনন্ত - ভাবিলে।
গুৱা - তামােল।
চটক - ঘনচিৰিকা।
ছাতিয়াল - ছতিয়না গছ।
তমাল - ডাঠ ক’লা বাকলিৰে এবিধ গছ।
তম্ভিয়ােক - ৰওক।
তহিতে - taat
দাশৰথী ৰাম - দশৰথৰ পুত্ৰ শ্ৰীৰামচন্দ্র।
দিবা ভাগে - দিনৰ ভাগতে।
duti -দ্বিতীয়।
দৃষ্টি বলাই চান্ত - দৃষ্টি প্ৰসাৰিত কৰি চালে।

দেখন্ত/দেখিলন্ত : দেখিলে।
নাৰঙ্গ - কমলা টেঙাৰ গছ।
পদ্মিনী দিঘী - পদুম ফুলৰ পুখুৰী।
পৱন নন্দন - বায়ু দেৱতাৰ পুত্র হনুমান।
পিয়াল - আঙুৰ গছ।
পেষওঁ - প্রবেশ কৰোঁ।
প্রবন্ধে - প্রচেষ্টাৰে।
প্রাঞ্চিৰ - প্রাচীৰৰ, দেৱালৰ। 
বদৰ -  বগৰী গছ, এবিধ লতা। 
বিৰাল - মেকুৰী। 
বীজপুৰ -  নেমুৰ দৰে এবিধ টেঙাৰ গছ। 
যােজন -  আঠমাইল দৈৰ্ঘ্যৰ। 
সলঙ্গা  - সােলং, সােলেং (এবিধ বৰ উগ্ৰ টেঙা ফল)। 
হাৰিঠা - মনিছাল বা ৰিঠা গছ।
অঙ্গদ - কিষ্কিন্ধ্যাৰ বানৰ-ৰাজবালীৰ পুত্র। অতিশয় বলশালী অংগদে সীতাউদ্ধাৰ অভিযানত শ্ৰীৰামচন্দ্রক সহায় কৰে।
কাশ্যপ নন্দন - সূর্যদেৱতা (ৰামায়ণ আৰু দুই-এখন পুৰাণ শাস্ত্রমতে সূর্যদেৱতা কাশ্যপ আৰু অদিতিৰ পুত্র)।
ত্রিকূট - ৰামায়ণ কাব্য অনুসৰি লৱণ সমুদ্রৰ মাজত থকা পর্বত। ইয়াৰ ওপৰতে লংকা নগৰ প্ৰতিষ্ঠাপিত হৈছে।
নীল - সীতা-অন্বেষণ আৰু সাগৰত সেঁতু বান্ধোতে ৰামচন্দ্রক সহায় কৰা | এজন সেনাপতি।
বিশ্বকর্মা - দেৱতাসকলৰ বিমান আৰু অলংকাৰ নিৰ্মাণ কৰা দেৱতা হিচাপে জনা যায়; শিল্পীগণৰ ভিতৰত শ্রেষ্ঠ বুলিও কোৱা হয়।
সুগ্রীৱ - ৰামায়ণ অনুসৰি বানৰৰাজ বালীৰ ভায়েক।



প্রশ্নাৱলী
ভাব-বিষয়ক : 
১। চমুকৈ উত্তৰ দিয়া ।
(ক) মাধৱ কন্দলী কোন আছিল? 
(খ) মাধৱ কন্দলীয়ে কোনখন মহাকাব্য অনুবাদ কৰিছিল? 
(গ) মাধৱ কন্দলীৰ ৰামায়ণত কেইটা কাণ্ড পােৱা যায়? 
(ঘ) মাধৱ কন্দলীক শংকৰদেৱে কি কবি বুলি অভিহিত কৰিছিল? 
(ঙ) মাধৱ কন্দলীৰ ৰামায়ণত বর্তমানে সন্নিবিষ্ট কোনটো কাণ্ড শংকৰদেৱে ৰচনা কৰে?
(চ) “হনুমন্তৰ লঙ্কাদর্শন’ কাব্যাংশ কোনটো কাণ্ডৰ পৰা লােৱা হৈছে? 

২। মাধৱ কন্দলীৰ বাহিৰে শংকৰ-পূর্ব যুগৰ কবিকেইজনাৰ নাম উল্লেখ কৰা। 
৩। মাধৱ কন্দলীয়ে কোন ৰজাৰ পৃষ্ঠপােষকতা লাভ কৰিছিল? তেওঁ ক'ৰ ৰজা আছিল? 
৪। তলত দিয়াবােৰৰ টোকা লিখা ?
হনুমন্ত, সুগ্রীৱ, নীল, অম্ৰাৱতী, কাশ্যপ নদন, বিশ্বকর্মা। 
৫। লংকা নগৰীৰ কাষৰ বন-বননিত হনুমন্তই কি কি ফল-ফুলৰ গছ দেখিবলৈ পাইছিল? 
৬। হনুমন্তই কি ৰূপ ধৰি লংকা নগৰীত প্রবেশ কৰিছিল? তেওঁ সেই ৰূপ ধৰাৰ কাৰণ কি আছিল? 
৭। হনুমন্তই গধূলি সময়ত দেখা লংকা নগৰীৰ এটি বর্ণনা দিয়া। 
৮। সুৰক্ষিত লংকা নগৰী দেখি হনুমন্তৰ মনলৈ কেনে ধৰণৰ চিন্তা আহিছিল? 
৯। সুবেল শৃংগত বহি হনুমন্তই কি ভাবিছিল? 
১০। হনুমন্তৰ লঙ্কাদর্শন’ কাব্যাংশৰ মূল কথাখিনি তােমাৰ নিজৰ কথাৰে লিখা। 

ভাষা-বিষয়ক :

১১। তলৰ শব্দবােৰৰ আধুনিক ৰূপ লিখা :
কণ্টকি; ছাতিয়াল; তহিতে; দেখিলন্ত। 
১২। সমার্থক শব্দ লিখা :
গগন; বিৰাল; গড়; সমুদ্র; পৱন।


Conclusion:

Assam seba board class 9 assamese lesson 13 নৱম শ্ৰেণীৰ অসমীয়া সাহিত্য চয়নিকা হনুমন্তৰ লঙ্কাদর্শন textbook for online raders.






Wrote by Akshay

Post a Comment

0 Comments

People

Ad Code